Специализированная банковская школа

       Mälim bolşy ýaly, Türkmenistan ýurdumyzda her ýylyň aprel aýy saglyk we sport aýy hökmünde bellenilýär. Bu aýda ýurduň ähli künjeklerinde sagdyn durmuş ýörelgelerini wagyz etmek, jemgyýeti saglyk we sport bilen meşgullanmaga höweslendirmek maksady bilen dürli çäreler guralýar.

        Bank mekdebiniň I we II ýyl talyplarynyň arasynda hem sportuň görnüşleri boýunça 2025-nji ýylyň 12-nji aprelinde mekdebiň sport toplumynda bäsleşik geçirildi. Bäsleşige talyplardan düzülen oglanlar we gyzlar toparlary gatnaşýar. Sport bäsleşigiň dowamynda I ýyllyk talyp toparlara mekdebiň mugallymy  B.M.Ussaýew  we II ýyllyk talyp toparlara O.Möjekow  ýolbaşçylyk etdiler.

       I we II ýyl talyp gyzlarynyň arasynda bäsleşik indiki sport oýunlaryndan ybarat boldy: woleýbol, tanap çekmek, el güýji, şaşka, küşt, stol tenisi, oturgyçly oýun we kim çalasyn kim çakgan. I we II ýyl talyp oglanlarynyň arasynda bäsleşik indiki sport oýunlaryndan ybarat boldy: woleýbol, tanap çekmek, agyr daş götermek, el güýji, şaşka, küşt, stol tenisi, oturgyçly oýun, kim çalasyn kim çakgan we futbol.

       Netijede, I we II ýyl talyp gyzlarynyň arasynda jemi utuk  2-6 hasabynda tamamlanyp, II ýyl talyp gyzlar ýeňiş gazandy. I we II ýyl talyp oglanlarynyň arasynda jemi utuk  4-6 hasabynda tamamlanyp, II ýyl talyp oglanlar ýeňiş gazandy. 

       Biz sag­dyn nes­li ke­ma­la ge­tir­me­giň, ýaş­la­ra gö­rel­de­li ter­bi­ýe ber­me­giň her bir maş­ga­la­nyň baş mak­sa­dy­na öw­rül­me­gi üçin gi­je-gün­diz ala­da ed­ýän hor­mat­ly Pre­zi­den­ti­mi­ziň be­lent ba­şy­nyň aman bol­ma­gy­ny, mer­da­na hal­ky­my­zyň sag­ly­gy­nyň pug­ta­lan­ma­gy üçin ba­dal­ga be­ren aý­dyň ýol­la­ry­nyň asyr­la­ra uza­ma­gy­ny tüýs ýü­rek­den ar­zuw ed­ýä­ris!

12.04.2025 ý.

         Berkarar döwletiň täze eýýamynyň Galkynyşy döwrüniň «Halkara parahatçylyk we ynanyşmak» ýylynda, Türkmenistanyň Gahrymany Atamyrat Nyýazow adyndaky Ýöriteleşdirilen bank mekdebiniň talyplarynyň arasynda "Zehin bäsleşigi" geçirildi. Mekdebimiziň 1-nji ýyl (kurs) talyplarynyň toparlaryndan düzülen komandalar we 2-nji ýyl (kurs) talyplarynyň toparlaryndan düzülen komandalar  özara bäsleşdiler.  "Zehin bäsleşigi" indiki ugurlar boýunça geçirildi: “Ykdysadyýet, maliýe we bank”, “Türkmenistanyň taryhy we häzirki zaman türkmen jemgyýeti”, we “Kompýuter ylymlary we sanly ykdysadyýet”.

         Bäsleşigiň soňunda “Bank işlerini programmirleşdirmek” hünäriniň 2-nji ýyl (kurs) talyplarynyň toparlaryndan düzülen komanda we  “Banklarda buhgalterçilik hasaba alnyşy” hünäriniň 1-nji ýyl (kurs) talyplarynyň toparlaryndan düzülen komanda finala çykdylar. Netijede,  “Bank işlerini programmirleşdirmek” hünäriniň 2-nji ýyl (kurs) talyplarynyň toparlaryndan düzülen komanda  ýeňiş gazanyp, 1-nji baýrakly orny eýelediler. Ýeňiş gazanan komandanyň düzümindäki talyplar: Agaýew Kerim, Orazkulyýew Şageldi, Gutlyýew Baýmyrat, Ataýewa Oguljennet, Garajaýewa Ogulşat we Taganbaýewa Elnara.

         Bank mekdebiniň mugallymlarynyň adyndan talyplarymyzy gutlamak bilen okuwlarynda üstünlikler arzuw edýäris!

17.05.2025 ý.

Hormatly Prezidentimiz Serdar Berdimuhamedowyň – Arkadagly Gahryman Serdarymyzyň öňdengörüjilikli ýolbaşçylygynda Berkarar döwletiň täze eýýamynyň Galkynyşy döwründe ýurdumyzda milli ykdysadyýetiň ähli ugurlary boýunça uly ösüşler, guwandyryjy we buýsandyryjy üstünlikler gazanylýar, il-ýurt, umumadamzat bähbitli giň gerimli özgertmeler depginli amala aşyrylýar. Gündogaryň beýik akyldary Magtymguly Pyragynyň doglan gününiň  300 ýyllygy mynasybetli “Pähim-paýhas ummany Magtymguly Pyragy” ýyly diýlip atlandyrylan 2024-nji ýylymyz eziz ata Watanymyz Garaşsyz, hemişelik Bitarap Türkmenistanyň  syýasy,  ykdysady, medeni durmuşynda agzybir we merdana halkymyz üçin taryhy ähmiýetli buýsançly hem-de guwançly wakalar bilen beslenýär.

Türkmenistanyň Gahrymany Atamyrat Nyýazow adyndaky Ýöriteleşdirilen bank mekdebinde 1–nji sentýabrda ir sagat 07:00-da “1–nji sentýabr - bilimler we talyp ýaşlar güni” mynasybetli baýramçylyk çäre geçirildi. Onda Hormatly Prezidentimiziň adyndan talyp ýaşlara, mugallymlara we bilim işgärlerine iberilen gutlag haty okaldy. Şeýle hem Ýöriteleşdirilen  bank  mekdebiniň mugallymlarynyň adyndan 1-nji ýyl talyplara gutlag sözleri aýdyldy, olara okuwda üstünlikler arzuw edildi. Soňra okuwa  täze giren talyplara “Pähim-paýhas ummany Magtymguly Pyragy” sapagy geçirildi.

Arkadag, Aşgabat şäherleriniň we Ahal welaýatynyň orta hünär okuw mekdepleriniň jemgyýetçilik başlangyçlary esasynda döreden okuw-usuly geňeşiniň meýilnamasy boýunça Türkmenistanyň Gahrymany Atamyrat Nyýazow adyndaky Ýöriteleşdirilen bank mekdebinde geçirilen 8-nji maslahat

             Türkmenistanyň Gahrymany Atamyrat Nyýazow adyndaky Ýöriteleşdirilen bank mekdebinde 2024-nji ýylyň iýun aýynyň 21-ne ýokary we orta hünär okuw mekdepleriniň arasyndaky 8-nji okuw-usuly maslahat geçirildi. Mekdebiň direktorynyň orunbasary A.T. Meredow gün tertibi bilen tanyşdyrdy we geçirilýän maslahatyň ähmiýeti barada aýdyp geçdi. Soňra Türkmenistanyň karz edaralary üçin hünärmenleri taýýarlamak öz taryhyny 1994-nji ýyldan alyp gaýdýandygy, häzirki wagtda ýurdumyzyň bank ulgamy üçin orta hünär bilimli hünärmenler Türkmenistanyň Gahrymany Atamyrat Nyýazow adyndaky Ýöriteleşdirilen bank mekdebinde taýýarlanýandygyny belläp, mekdebiň işjeňligi barada gysgaça gürrüň berdi. Mundan başgada, mekdepde 2022-nji ýyla çenli üç hünär, ýagny, Banklarda buhgalterçilik hasaba alnyşy; Bank karzlaşdyrmasy; Bank amallarynyň tehnologiýasy hünärleri boýunça orta hünär bilimli hünärmenler taýýarlanyp, şu okuw ýylyndan başlap bolsa Bank işlerini programmirleşdirmek hünäriniň açylandygy barada aýdyp geçdi.

             Soňra mekdebiň mugallymy Bahar Baýramowa ýokary we orta hünär okuw mekdeplerinde jemgyýetçilik başlangyçlary esasynda garaşsyz toparlary döretmek we hasap-synaglaryň obýektiwliligini barlamak barada çykyş etdip, bank mekdebinde hasap-synag möwsüminde talyplaryň obýektiw bahalandyrylyşyna barlagy geçirmek üçin jemgyýetçilik başlangyçlary esasynda garaşsyz topar hem-de hasap-synag möwsümi döwründe talyplaryň arzalaryna we şikaýatlaryna seretmek üçin arza-şikaýatlara garaýan toparyň döredilendigi barada aýdyp, geçirilen işleriň mysallaryny we nusgalaryny slaýtlaryň üsti bilen görkezdi.

             Ikinji bolup, Aşgabat şäherindäki mehanika tehnologiki orta hünär okuw mekdebiniň okuw bölüminiň müdiriniň terbiýeçilik işleri boýunça orunbasary – Şanazar Çäşemowiç Muhyýew orta hünär okuw mekdepleriniň okuw işiniň hiliniň ölçeglerini we görkezijilerini hasaplamagyň usulyýetini tassyklamak hakynda” Türkmenistanyň Bilim Ministrliginiň  buýrugynyň ýerine ýetirilişi barada çykyş edip, buýrugyň umumy düzgünleri, programma üpjünçiliginiň elýeterliligi, okuw işiniň hiliniň ölçeglerini we görkezijilerini hasaplamagyň usulyýeti, ýagny, okuw kitaplary we gollanmalary, sapaklaryň wideoýazgylar bilen üpjünçiliginiň derejeleri, ýokary we orta hünär okuw mekdeplerinde geçirilen hasap-synag möwsümleriniň hem-de dersler boýunça geçirilýän Döwlet bäsleşiginiň netijeleriniň görkezijileri barada giňişleýin çykyş etdi.

            Indiki çykyş “Türkmenhowaýollary” agentliginiň Howa ulaglarynyň işgärlerini taýýarlaýan mekdebiň mugallymy Gülnar Hudaýberenowna Rahmanowa Sosial torlary ulanmakda ýüze çykýan meseleler we olary dogry ulanmaklygy ündemegiň zerurlygy barada çykyş etdi. Çykyşynda   XXI asyrda sosial toruň ählimiziň durmuşymyzyň aýrylmaz bölegi bolup, ýaşaýyş-durmuşymyzy ýeňilleşdirýändigi, sosial torlaryň görnüşleri, olary ulanmakda ýüze çykýan meseleler hem-de olaryň çözgütleri, durmuşymyzyň ähli pudaklaryna sanly ulgamyň we sosial torlaryň ornaşdyrylyşy barada aýdyp, dürli mysallaryň üsti bilen giňişleýin çykyş etdi.

  Maslahatyň soňunda gatnaşyjylar çykyşlar boýunça sorag-jogap we pikir alyşdylar.

Maslahat Ýöriteleşdirilen Bank mekdebiniň çeper höwesjeňler toparlarynyň çykyşlary bilen jemlendi.